القائمة الرئيسية

الصفحات

قواعد الشتاء الاربعين للوقاية من الإنفلونزا

ماهي قواعد الشتاء الاربعون

قواعد الشتاء الاربعين

العشرون قاعدة الأولى

١- من قواعد الشتاء اطفوا التكيفات .

٢- اقفلوا الشبابيك وانتو نايمين وخلوا لبس الأطفال مناسب لعادة "رفس الغطاء" المتأصلة فى الطفل المصري.

٣- كوباية ينسون قبل النوم ،

كوباية موز باللبن 

-عليها ڤيتامينات اليوم 

- قبل النزول للمدرسه، 

علبة زبادى، صدقنى هى كل ما أتمنى لطفلى فى ذلك العالم المتوحش، 
٤- متشربش سجاير يا محترم .
٥- اطفى التكيف يا مدام .

٦- ڤيتامينات اليوم : 

 (كلها بدون الحاجة تحاليل)

ڤيتامين د، ربع قطارة ڤى دروب لكل الأطفال (٧٠٠ وحدة) للأبد ، 

حديد 

-ربع قطارة هيدروفرين يومياً من ٦ شهور لسن سنتين ،

أ ڤيتون لكل الأطفال من سن سنة ونصف ٤ كبسولات دفعة واحدة كل ٦ أشهر لسن ٥ سنوات (فيتامين أ بالذات بيزود مناعة الجهاز التنفسي).

٧- الصبح اغسلى وشّه بمياه بارده شَرَّبيه كوباية مياه فاتره ، 
كوفيّه عشان الهوا الساقع ، وصيه يقفل شباك الباص او العربيه ، 
سواقين العربيات أو المدرسين لازم يفتحوا الشبابيك اللى جنبهم نص فتحة عشان نهوى الباص أو الفصل ونجدد الهوا، 
متنسوش ان القاعدة " نتدفا كلنا ،، نتعدى كلنا"
٨- أهذا هو الشتاء الذى كرهت الصيف لأجله !
٩- وصايا لابنك مفهاش هزار -الغلطة بعدوىٰ- :
مناديلك في إيدك ، 
سنداوتشاتك فى جيبك ،
كوبايتك في شنطتك ،
اللى يقولك سلفنى حاجة من دول قطّعُه. 
١٠-مفيش حاجة يا مس اسمها بوسو بعض يلا عشان تصالحوا بعض 
- انا ابنى يبقى مخاصم المدرسه كلها وبصحته احسن ما كل المدرسه تكون بتحبه وهوا مرمى في السرير سخن مولع وعنده برد!
١١-مفيش حاجة اسمها مدرسه وابنك سخن ، مفيش مدرسه وابنك بيكح طول الليل ، مفيش مدرسه وانتى عارفه ان الجو تلج وهوا وابنك بيتعب في الجو دا - متغامريش بصحة ابنك.

١٢- أصابك "بردٌ" أم رميت ب"ڤيرسِ"؟؟

لا الصراحة عندى حساسية أنف.

١٣- البرد ماهو الا ڤيروس، 

غالباً بيقفل الأنف ويبدأ بخنفرة ويكمل برشح ،، قدامك ٤ سيناريوهات ،

ينزل على الصدر يعمل كحة ،

ينزل على المعده يخليه يرجع ،

يقفل الودان 

-قناة استاكيوس يعمل التهاب اذن وسطى وحرارة ،

يقفل الجيوب الأنفية يعمل التهاب وحرارة وصداع ويبقى الرشح أصفر

- أو يخف من غير ما يعمل حاجة من دول.

أيوا يعنى عاوز ايه ؟؟ 
الحق البرد ف أوله قبل ما نلبس كلنا فى الحيط.

١٤- الحساسية ما هى إلا برد متكرر .

١٥- الرشح له تسليك الأنف ، 

والكحة ليها سوايل دافيه ، والاذن ليها مسكنات وكشف طبيب ،

والجيوب الأنفية ما بتهزرش ،غالباً لازم انتى بيوتك!

١٦- ما قلنا طفو التكيفات !
إيه ؟؟  الجو لسه حر شويه ؟؟
طيب افتحه ب ٣ شروط  ، 
الأطفال يكونوا مبيتعبوش معاه ، 
وتطفيه اول ما يناموا ،
وميكونش عندهم برد وتفتحيه ،
آه تقعدوا كلكو طرزان في البيت احسن ما نبات بنزلة شعبية بره البيت،
١٧- التكيفات غير انها بترزع الهوا الساقع فى الوشّ ، 
بتنقل "حلاوة شمسنا وخفة دمنا والجوّ عندنا" كله من برا البيت لجوا البيت ، يعنى بالبلدى بتقعد ابنك فى الشارع بترابه بجراثيمه بحشراته بحبوب لقاحه بسلاطاته ببابا غنوجه 
- الا اذا كنت من الأعيان وعندك تكيف بلازما كلاستر فملكش دعوة بالكلام ده

١٨-حساسية يعنى طفل حساس - وحاجة بتعمل له تحسس ،، 

لو قدرنا نخدّر تحسّس الطفل (بأدوية الحساسية) ،، 

أو نبعد عن الحاجة اللى بتعمل تحسس (بنعرفها بالتحاليل ) .. يبقى بدأنا  نعالج الطفل صح بإذن الله.

١٩- "٨٨٪" من حالات حساسية الصدر طلع معاها حساسية أنف واحنا مش عارفين ،، يعنى ٨٨٪ من اسباب الكحة غالباً ذاك العضو القابع فى أعلى ولا ينفك يلقى علينا بقاذوراته!

العشرون قاعدة الاخيرة

٢٠- أعطنى بخاخة كورتيزون للأنف وبخاخة صدر ، وسأقضى لك على ٩٠٪ من أسباب الكحة فى هذا العام.

٢١- مش معقول يبقا ابنك كل تغيير فصول او "دخلة شتا" بيجيلوا زكام ، رشح ، خنفرة ، 
هرش أنف ، عطس ، كحة ليلية .. وتبقى مش عارفه ان دى أعراض حساسية الأنف وان علاجها بسيط جداً .... اقفل الحنفية.
٢٢- زودى قطعة ملابس بالليل.
٢٣-" التتقيل" في الملابس مالوش قواعد ،، اليوم بيومه ،
انهارده حر بكرة تلج بعده ولعه الجو عندنا مجنون يا جماعه أستاذ الجغرافيا بتاع حار جاف صيفا دفئ ممطر شتاءاً بيتحاسب دلوقتى عشان الكدب بتاعه ده.

٢٤- قاعدة بسيطة للتعامل مع الكحة لإخوانى الدكاترة :

اول ما تلاقى معاها رشح او زكام اعرف ان الحنفية فتحت والبلغم نزل عالصدر ، نعالج الحنفية.
لو الكحة قلبت بنهجان ، صفير صدر (تزييق)    
يبقى بدأت تقفل الشعب الهوائية وهنحتاج موسع شعب حتماً .
لو اتكرر موضوع الحنفية 
لازم تفكر ف حساسية انف .
لو اتكرر موضوع النهجان والتزييق يبقا حساسية صدر .
لو الاتنين اتكرروا يبقا حساسية انف وصدر 
٢٥- البخاخات وجلسات البخار مش مخدرات .

٢٦- البخاخات (انف وصدر) أحدث علاج في العالم للحساسية ، 

اقل تكلفة ، أأمن فى الآثار الجانبية ، أسرع فى النتيجة - لكنكم تحبون الأنتى بيوتك.
٢٧- الأنتى بيوتك مش علاج للحساسية.
٢٨- "لو الرشح أصفر والحرارة عالية (٣٩) ٣ ايام ،، أو الزكام والرشح والكحة مستمرين بلا توقف ١٠ ايام(حتى بدون حرارة) ، دى علامات التهاب الجيوب الأنفية الحادّ وهنحتاج غالباً انتى بيوتك !"

"الأكاديمية الأمريكية للأنف والأذن والحنجرة".
٢٩-حالات حساسية الأنف والصدر فائقة التحسس ،
هنحتاج تحاليل حساسية Specefic Ige للأكل والمشمومات تحت اشراف طبيب عشان نحدد ايه اللى بيتعبكم ونتجنبه او نعالجه بالأمصال.
٣٠-قاعدة بسيطة للتعامل مع الكحة لإخواتى غير الدكاترة :
السوايل الدافية احسن مذيب للبلغم ، العسل باللمون ممتاز ، 
حلة مياه مغليه واستنشاق البخار اللى طالع منها احسن مرطب للحنجرة والاحبال الصوتيه والكحة الغليظة (الخُنّاق) ،
كل اما تلحق البرد بدرى كل اما تمنع مضاعفاته متكسلش تكشف عند دكتور ثقة ،، السجاير اكبر سبب مساعد لاستمرار كحة ابنك نتوب بأه!
٣١- بعض مفاتيح الكحة المختفية :
كحة الارتجاع 

ارتجاع سوايل المعده من المرئ للصدر في الاطفال اقل من سنة وعلاجها مضادات ارتجاع مش اى دوا كحة !

كحة الخُنّاق 

صوت غليظ كالنباح سببها التهاب حنجرة وأحبال صوتية وعلاجها جلسات ادرينالين وكورتيزون مش اى دوا كحة !

كحة السعال الديكى 

نوبات كحة متتالية خلال زفير واحد بعدها شهيق طوييل Whoop وعلاجه مضاد حيوى معين ومهدئ سعال مش أى دوا كحة !

الكحة الليلية او بعد استيقاظ النوم غالباً حساسية أنف .!
الكحة والنهجان والصفير مع المجهود او اللعب او الرياضه ...غالباً حساسية صدر ..!
الكحة مع أنواع معينة من الطعام أو روائح 
حساسية طعام او روائح و logic يعنى نمنعها تماماً.

الكحة الغير مفسرة نتطمن على القلب ، نستبعد اى حاجة ضاغطة على الرئتين، 

الارتجاع الداخلي ،، حساسية الانف الصامته ، وبعض الامراض النادرة . ومننساش الكحة الهستيرية فى بعض الاطفال.!

٣٢- متفقديش أعصابك لو ابنك سخن .
٣٣-التعامل مع الحرارة بالترتيب : 
قيسي الحرارة تحت الابط وزودى نص درجة ،
 لو فوق ٣٨ خففى الهدوم و هوى الأوضه،

فوق ٣٨،٥ ادى سيتال 

-او بروفين لعمر فوق ٦ شهور وحميه بمياه فاتره فوراً ربع ساعه مغمور تماما

فوق ٣٩ خافض تانى كل ٤ ساعات ، حموم تانى كل ساعه، وبالتأكيد اكشفى فوراً .
٣٤- مفيش حاجة اسمها غطى الواد عشان بيترعش 

- انتى كده بتزودي الحرارة والعرق وده بيبهدل الطفل الصح نقلعه ونحميه ، 

اه نحميه وهوا بيترعش عادى والمصحف!

٣٥-التعامل مع ترجيع الشتاء بالترتيب :

ريح المعده وبلاش نأكل بعد الترجيع ٢-٤ ساعات. 

لو في رشح او برد عالجه غالباً هوا السبب بينزل عالمعده فالطفل يرجع .

الترجيع مستمر؟ ابرة ترجيع عضل وكشف فوراً. 

متتخمّش فى الإسهال البسيط او الحمام السايل غالبا سببه افرازات الانف - العلاج فوق مش تحت!

٣٦- نصايح ذهبية للتخلص من مثيرات الكحة و الحساسية!

إخراج السجاجيد من اوض النوم ، كنس التراب ومسحه بعناية من الزوايا والاركان، 
البعد عن كل ماله علاقة بالفرو والريش (دباديب ، قطط ، كلاب ، طيور)، غلى الملايات و اكياس المخدات واغطية الفراش على درجة حرارة ٧٠ كل ٣ ايام ، 
التخلص من الحشرات والصراصير والفئران ورمى القمامة بشكل يومى ، 
التخلص من الرطوبة بتنشيف السجاد وتعريضها للشمس و تنشيف المياه المتجمعه تحت الاحواض ورطوبة الجدران باصلاح المواسير ، 
البعد عن التراب و الدخان واماكن حرق القش او الروايح النفاذة ، البعد عن السجاير والحشيش ،نخف الحشيش شوية ياخوانّا

٣٧- الكورتيزون مش سم ، ومش قاتل ، ومش حشيش ، ومش عفريت تترعب لما تعرف ان ابنك بياخده ،

انا اديت ابنى ال ٣ شهور كورتيزون ، وال٣ سنين كورتيزون ، 

بس بحساب و بعلم وهوا اقوى علاج لنوبات الحساسية الشديدة ، ولكحة الخنّاق الحنجرية ، 

وأأمن علاج بخاخ وأحسنه لحساسية الانف والصدر . 

احنا آسفين يا كورتيزون

٣٨-عاوزه تزودى مناعة طفلك ؟؟؟

نام كويس ٨-١٠ ساعات ؟؟  

أكل فاكهة يوميا 

- موز او كيوى او فراولة او بطيخ او مانجا-؟؟ لعب رياضة طويلة النفس زى السباحة ؟؟ 

فيتامين سي ولمون او برتقال وأوميجا ٣ يومياً ؟؟ 

إيه ؟ 
مفيش فلوس !!!
طيب ما السمك موجود انتى هتتلككى 

٣٩- عاوزه تزودى مناعة طفلك ؟

اديتى ڤيتامين د بشكل مستمر وبجرعات كافية ؟؟

اديتى برونكوڤاكسوم من ٦ شهور وانتى طالعه ؟

اديتى مصل الانفلونزا من ٦ شهور وانتى طالعه ؟

اديتى مصل المكورات الرئوية من شهر ونص ل ٥ سنين؟

اديتى ڤيتامين أ (A-viton) من سنة ونص ٤ كبسولات (دفعة واحدة) تتكرر كل ٦ شهور لسن خمس سنين ؟  

مش معقول عملتى كل ده ومحصنتيش أطفالك كل يوم ب "أعوذ بكلمات الله التامة من كل شيطانٍ وهامّه ومن كل عينٍ لامّه" زى ما النبى ﷺ كان بيحصن الحسن والحسين ! 
٤٠-الأستاذ ورا طفيت السجارة ؟؟ 
الآنسة قدام قفلتى التكيف ؟؟؟ 
المدام هناك تقّلتى الهدوم ؟؟ 
الحاجة اللى معانا عملتى صنية البطاطس فى الفرن و حمص الشام والشوكولاته السخنه وقعدتى مع احفادك تحت البطانيه تحكيلكم حكايات الماضي. 
.. 
دمتم سالمين
هل اعجبك الموضوع :

تعليقات